Tá imirce go mór chun tosaigh sa chlár gnó poiblí agus polaitiúil, ach ní i gcónaí a bhíonn an insint maidir le himirce saor ó chlaonadh. Ag an am céanna, aithnítear go bhfuil dúshláin shuntasacha ag baint le himircigh a lánpháirtiú i bpobail óstacha. Is le haird ar na dúshláin sin a scrúdaigh iniúchóirí an Aontais an chaoi ar thacaigh an Ciste um Thearmann, Imirce agus Lánpháirtíocht (AMIF) le lánpháirtiú náisiúnach tríú tír san Aontas.

Tar éis cogadh foghach na Rúise i gcoinne na hÚcráine in 2022, tháinig méadú ar líon na náisiúnach tríú tír san Aontas go dtí 27.3 milliún, i.e. 6.1 % de dhaonra iomlán an Aontais. Dá ndéanfaí na náisiúnaigh tríú tír go léir san Aontas a thabhairt le chéile mar thír amháin, bheadh an tír sin i measc na dtíortha is mó daonra san Aontas.

D’fhéadfadh sé go mbeadh deighilt i sochaithe Eorpacha mar thoradh ar éagumas imircigh a lánpháirtiú. Tá bearnaí socheacnamaíocha idir náisiúnaigh tríú tír agus saoránaigh AE, rud a fhágann go bhfuil baol bochtaineachta agus eisiamh sóisialta ann, chomh maith le baol go mbeadh ráta dífhostaíochta níos airde ann. Taispeánann na sonraí gur léiriú é dearcadh an phobail ar rath bheartas lánpháirtíochta. Nuair a bhíonn na beartais sin deartha go maith, bíonn an pobal óstach níos caoinfhulangaí d’imircigh.

Is faoi Bhallstáit an Aontais atá sé a straitéisí náisiúnta féin maidir le lánpháirtiú imirceach a cheapadh. Ciallaíonn sé sin go bhfuil tacaíocht an Aontais ag dul chuig córais a d’fhéadfadh a bheith an-difriúil ó thír go chéile. Is ionstraim airgeadais de chuid an Aontais é an Ciste um Thearmann, Imirce agus Lánpháirtíocht (AMIF) le haghaidh lánpháirtiú imirceach. Bhí tuairim is €1 bhilliún i gceist leis le haghaidh 2014-2020, agus tá beagnach dúbailt ar an méid sin le haghaidh 2021-2027. Thacaigh bearta lánpháirtíochta le beagnach 10 milliún duine in 2014-2020 agus bhí costas beagnach €800 milliún ag baint leis sin don Aontas.

Tá scrúdú déanta ag iniúchóirí an Aontais féachaint cén chaoi ar úsáid an Coimisiún Eorpach agus na Ballstáit, laistigh dá sainchúraimí éagsúla, tacaíocht AMIF ar bhealach fónta agus éifeachtach chun tacú le lánpháirtiú imirceach. Rinne na hiniúchóirí obair ar an bhfód freisin sa Fhrainc, sa Ghearmáin, sa tSualainn agus sa Spáinn.

Ní chlúdaíonn an tuarascáil iniúchóireachta, atá le teacht faoi dheireadh na bliana, daoine atá ina gcónaí san Aontas go neamhdhleathach. Beidh sí ina comhlánú ar an gcuntas cuimsitheach ar bheartas imirce an Aontais atá tugtha cheana féin ag an gCúirt Iniúchóirí ó dhearcaí éagsúla le blianta beaga anuas: cur chuige na ‘dteophointí’ mar fhreagairt ar ghéarchéim na ndídeanaithe, nósanna imeachta um thearmann agus um fhilleadh, agus comhar le tríú tíortha um athligean isteach.