Il-QEA tippubblika r-riżultati tax-xogħol tal-awditjar tagħha f’diversi rapporti – rapporti annwali, rapporti annwali speċifiċi u rapporti speċjali – skont it-tip ta’ awditu li jkun twettaq. Hija tippubblika wkoll opinjonijiet u pubblikazzjonijiet analitiċi.
Rapporti annwali fihom ir-riżultati tax-xogħol tal-awditjar finanzjarju u tal-konformità relatat mal-baġit tal-Unjoni Ewropea u mal-Fondi Ewropej għall-Iżvilupp. Huma jinkludu d-dikjarazzjonijiet ta' assigurazzjoni annwali, u jkopru wkoll aspetti ta' ġestjoni baġitarja u ta' prestazzjoni baġitarja.
Rapporti speċjali jippreżentaw ir-riżultati ta' awditi magħżula tal-prestazzjoni u tal-konformità li jikkonċernaw oqsma ta' nfiq jew ta' politika speċifiċi, jew kwistjonijiet baġitarji jew ta' ġestjoni speċifiċi.
Pubblikazzjonijiet analitiċi jinkludu l-analiżijiet panoramiċi, id-dokumenti informattivi u analitiċi, l-analiżijiet rapidi dwar każijiet speċifiċi u d-dokumenti ta’ sfond. Analiżijiet panoramiċi huma dokumenti deskrittivi u analitiċi dwar oqsma ta' politika jew kwistjonijiet ta’ ġestjoni kumplessi u fuq skala kbira, li fihom aħna nippreżentaw l-esperjenza u l-għarfien akkumulati tagħna dwar is-suġġett magħżul, spiss minn perspettiva trażversali. Dokumenti informattivi u analitiċi huma simili għall-analiżijiet panoramiċi (dokumenti deskrittivi u analitiċi ta’ politika jew ta’ ġestjoni), iżda jindirizzaw suġġetti li jkunu aktar iffukati. Analiżijiet rapidi dwar każijiet speċifiċi jippreżentaw u jistabbilixxu fatti li jikkonċernaw kwistjonijiet jew problemi speċifiċi u ffukati ħafna u, jekk ikun meħtieġ, jistgħu jinkludu analiżi li tgħin fil-fehim ta’ dawk il-fatti. Dokumenti ta’ sfond jipprovdu informazzjoni bbażata fuq xogħol ta’ tħejjija li jsir qabel il-bidu ta’ kompitu tal-awditjar li jkun għaddej. Huma intenzjonati biex ikunu sors ta’ informazzjoni għal dawk interessati fil-politika u/jew fi programm li jkunu qed jiġu awditjati.
Opinjonijiet jipprovdu l-fehmiet tagħna dwar liġijiet ġodda jew liġijiet aġġornati b’impatt sinifikanti fuq il-ġestjoni finanzjarja tal-UE.
Rapporti annwali speċifiċi jippreżentaw ir-riżultati tal-awditi finanzjarji annwali tal-aġenziji, il-korpi deċentralizzati u l-impriżi konġunti tal-UE.
Ir-rapporti, l-opinjonijiet u l-analiżijiet kollha jiġu ppubblikati fuq is-sit web tal-QEA bil-lingwi uffiċjali tal-UE.