L-INTOSAI (Organizzazzjoni Internazzjonali tal-Istituzzjonijiet Supremi tal-Awditjar) hija l-organizzazzjoni professjonali ta' SAIs ta' pajjiżi li jagħmlu parti min-Nazzjonijiet Uniti jew l-aġenziji speċjalizzati tagħha. Bħalissa, hija tinkludi 195 membru sħiħ (li minnhom il-QEA hija l-uniku korp supranazzjonali), 5 organizzazzjonijiet internazzjonali bi sħubija assoċjata, u membru affiljat. L-INTOSAI hija elenkata bħala organizzazzjoni ta’ appoġġ tan-Nazzjonijiet Uniti.
Sa mill-1980, u anke qabel ma saret membru sħiħ, il-QEA pparteċipat b’mod attiv f’għadd ta’ attivitajiet u oqsma ta’ xogħol tal-INTOSAI, b’mod partikolari billi pprovdiet input prattiku għat-tħejjija ta’ standards u ta’ gwida, kif ukoll ippromwoviet l-aħjar prattika u l-aċċertament tal-kwalità. Il-QEA kienet irrappreżentata wkoll f’kull kungress tal-INTOSAI li jsir kull tliet snin, u f'ħafna okkażjonijiet ħadet ir-responsabbiltà għat-tema tal-kungress.
Fl-2004, il-QEA saret membru sħiħ tal-INTOSAI wara l-modifika fl-istatuti tal-INTOSAI rigward is-sħubija ta’ SAIs minn organizzazzjonijiet supranazzjonali.
Fl-2016, wara ħafna snin ta’ involviment fis-sottokumitati għall-awditjar finanzjarju, tal-konformità u tal-prestazzjoni, il-QEA nħatret bħala l-Viċi President tal-Kumitat għall-Istandards Professjonali tal-INTOSAI.
Il-QEA hija wkoll membru tal-Kumitat għall-Bini tal-Kapaċità u tal-Kumitat għall-Kondiviżjoni tal-Għarfien tal-INTOSAI, u għandha rwol attiv f’bosta korpi ta’ ħidma ta’ dawn il-Kumitati.
Il-QEA hija membru tal-EUROSAI (Organizzazzjoni Ewropea tal-Istituzzjonijiet Supremi tal-Awditjar), il-grupp reġjonali Ewropew tal-INTOSAI. L-EUROSAI ġiet stabbilita fl-1990 minn 29 SAI Ewropea u mill-QEA u attwalment tinkludi 50 membru. Sa mit-twaqqif tagħha, il-QEA kienet involuta b’mod intensiv f’diversi korpi ta’ ħidma tal-EUROSAI.
Il-QEA serviet bħala l-awditur estern tal-EUROSAI għall-perjodu 2008-2011 u bħala membru tal-Bord Governattiv tal-EUROSAI għall-perjodu 2011-2017.