Il-Qorti Ewropea tal-Awdituri torganizza tliet sessjonijiet ta’ traineeship kull sena fl-oqsma li huma ta’ interess għal xogħolha. Kull traineeship jingħata għal perjodu ta’ tliet xhur, erba’ xhur, jew massimu ta’ ħames xhur. Tista’ tingħata rimunerazzjoni (EUR 1350 fix-xahar) jew le, skont l-approprjazzjonijiet baġitarji disponibbli.
It-tliet sessjonijiet ta’ traineeship jiġu organizzati kull sena, bid-dati tal-bidu li ġejjin:
- fl-1 ta’ Frar,
- fl-1 ta’ Mejju,
- fl-1 ta’ Settembru.
Sabiex ikunu eliġibbli biex jagħmlu perjodu ta’ traineeship, l-applikanti jridu:
ikunu ċittadini ta’ wieħed mill-Istati Membri tal-Unjoni Ewropea, għajr meta tkun ingħatat deroga mill-awtorità tal-ħatra;
ikollhom lawrja jew diploma universitarja rikonoxxuta li tagħti dritt għall-grupp ta’ funzjoni AD(*) kif iddefinit fir-Regolamenti tal-Persunal għall-Uffiċjali tal-Unjoni Ewropea, jew inkella jkunu kkompletaw mill-inqas erba’ semestri ta’ studji universitarji f’qasam ta’ interess għall-Qorti;
jixtiequ li jiksbu taħriġ prattiku relatat ma’ wieħed mill-oqsma ta’ attività tal-Qorti tal-Awdituri;
ma jkunux diġà bbenefikaw minn traineeship (rimunerat jew le) f’istituzzjoni oħra jew korp ieħor tal-UE;
jiddikjaraw li huma għandhom għarfien approfondit ta’ waħda mil-lingwi uffiċjali tal-Unjoni Ewropea u għarfien sodisfaċenti ta’ mill-inqas lingwa uffiċjali oħra tal-Unjoni Ewropea.
Il-kandidati magħżula jridu jipprovdu dikjarazzjoni li qatt ma nstabu ħatja ta’ xi reat skont kif imfassal għas-servizz ċivili mill-awtoritajiet nazzjonali tagħhom, u ċertifikat mediku li jiċċertifika li huma fiżikament kapaċi jwettqu l-kompiti tagħhom.
Qabel ma tapplika, nitolbuk tieħu nota tal-informazzjoni importanti li ġejja:
- Minħabba l-volum għoli ta’ applikazzjonijiet, aħna ma nweġbux lil kull applikant individwali.
- L-applikazzjonijiet online biss jiġu pproċessati. Applikazzjonijiet spontanji jew CVs mibgħuta bil-posta, fax jew e-mail ma jiġux aċċettati.
- Id-dipartiment tar-Riżorsi Umani tal-QEA jikkuntattja biss lill-kandidati ammessi.
L-iskeda tas-sessjonijiet ta’ skemi differenti ta’ taħriġ
Jekk jogħġbok ikklikkja fit-tabella hawn taħt biex tapplika bl-Ingliż.