Politika dwar id-Diversità u l-Inklużjoni

Il-Qorti Ewropea tal-Awdituri (QEA), li hija l-awditur estern tal-Unjoni Ewropea, hija impjegatur li jħaddan il-prinċipju ta’ opportunitajiet indaqs. Il-prinċipju ta’ opportunitajiet indaqs huwa minqux fil-leġiżlazzjoni li fuqha x-xogħol tal-UE huwa bbażat, notevolment fl-Artikolu 1d tar-Regolamenti tal-Persunal, li jipprojbixxi diskriminazzjoni bbażata fuq kull raġuni (bħall-ġeneru, razza, kulur, oriġini etnika jew soċjali, fatturi ġenetiċi, ilsien, reliġjon jew twemmin, opinjoni politika jew kull opinjoni oħra, sħubija f’minorità minoranza nazzjonali, proprjetà, twelid, diżabilità, età, jew orjentazzjoni sesswali. Il-prinċipju jqis ukoll li l-ugwaljanza sħiħa bejn irġiel u nisa fuq ilpost tax-xogħol hija essenzjali.

L-impenn tal-QEA favur opportunitajiet indaqs jidher ukoll fil-Linji Gwida dwar l-Etika tagħna (id-Deċiżjoni Nru 66-2011), li jiddikjaraw li aħna se nevitaw kwalunkwe forma ta’ diskriminazzjoni u se nikkontribwixxu għall-implimentazzjoni ta’ politika ta’ opportunitajiet indaqs għall-persunal kollu. L-istess Linji Gwida jiddikjaraw ukoll li lmembri u l-maniġers għandhom jieħdu passi biex jiżguraw li l-persunal kollu jingħata trattament indaqs u opportunitajiet indaqs fl-iżvilupp professjonali tiegħu.

Minbarra li tiggarantixxi opportunitajiet indaqs għall-persunal tagħha, il-QEA hija impenjata li tqiegħed politika dwar id-diversità u l-inklużjoni fis-seħħ. L-intenzjoni hija li jinħoloq ambjent tax-xogħol divers u kultura inklużiva li fiha kulħadd iħossu apprezzat u kapaċi jilħaq il-potenzjal sħiħ tiegħu.

Links relatati